Revenue Stream: Amazing Opportunities and Hidden Challenges in Urdu Audiobooks

کوئی بھی کام اگرآپ مستقل کرتے رہیں تو اس کے دواثرات لازماً ہوتےہیں۔ پہلا یہ کہ اس کام کے حمایتی ومخالف پیداہوجاتے ہیں۔ یعنی کچھ لوگ ایسے ہوتے ہیں، جوآپ کی محنت کوسراہتے ہیں،حوصلہ افزائی کرتے ہیں، ساتھ مل کرچلنےکی کوشش کرتے ہیں،تعاون کی پیشکش کرتےہیں۔ اور کچھ ایسے بھی ہوتے ہیں،جو ناک بھوں چڑھاتےہیں، الزامات لگاتےہیں،روکنےکی کوششیں کرتے ہیں۔ ہر دو طرح میں مخلصین ومنافقین دونوں شامل ہوتے ہیں۔ آوازِاردوان تمام مراحل سے گزرچکاہے۔ اس پر سرقہ کےالزامات بھی لگے ہیں اوران الزامات کادفاع کرنےوالے بھی آوازِاردو کےپرستار ہی تھے۔ الحمدُلِللّٰہ۔

دوسرا اثر یہ ہوتاہے کہ اس کام کے تمام نشیب وفراز آپ کےسامنےکُھل جاتے ہیں، مثلاً اردوصوتی کتاب کےبارے میں جتنی مدلّل گفتگو اس وقت میں کرسکتاہوں، شاید ہی کوئی کرسکے۔ میں ہر فورم پر ،ہر وقت اس بارے میں بات کرنےکےلیے تیار رہتاہوں۔ میں جانتا ہوں کہ دورِحٰذا میں یہ کام کس قدرضروری ہے اور اس کےنہ ہونےسے کس قدرنقصان ہورہاہے۔مگر کوئی  بامقصدبات ہو،مذاکرہ /مکالمہ  ہو تو آدمی اپنی بہترین صلاحیتیں بھی صرف کرے ۔ بلاوجہ بحث برائے بحث میں نے کبھی نہیں کی۔ 

 اگرمیں یہ کہوں کہ آوازِاردو کاکام میں نے کسی مالی منفعت کی امید کےبغیر شروع کیاتھا تو یہ منافقت ہوگی۔ مگرایک بات کا افسوس ہے، کہ جب بھی  میں نےکسی کےسامنے اس کام کا تذکرہ کیا،اس نےبجائے یہ پوچھنےکے،کہ میں کس طرح اس کام میں اپناحصہ ملاسکاہوں،عموماً یہی سوال کیا کہ آپ نے اب تک اس سے کیا کمایا۔  جب آوازِاردوصرف واٹس ایپ گروپ تک محدودتھا اور روزانہ کتابوں کے اقتباسات پڑھ کرسنارہاتھا، تب تو آمدنی کا کوئی سوال ہی پیدانہیں ہوتاتھا، مگر اس وقت بھی دل میں خواہش تھی کہ کاش! کوئی قدردان یہ کہے کہ آپ یہ کتاب ہمیں مزید سنائیں، ہم اس کامحنتانہ ادا کریں گے۔ اکثر احباب اقتباس سننے کےبعد پی۔ڈی۔ایف کتاب کی فرمائش کرتے تھے، جو فراہم کردی جاتی تھی۔ واضح رہے کہ میری جتنی بھی آڈیوزاور ویڈیوزاب تک دیکھی یا سنی جاچکی ہیں،تقریباً سب کی پی۔ڈی۔ایف میرے پاس محفوظ ہیں۔ مقصد یہی تھا کہ اردوبولنےوالےعوام کومعلوم ہو کہ ادب کو”سننا”بھی ایک دلکش چیز ہے، اس سے کس کو کیافوائد حاصل ہوئے ،یہ تو ہرایک خود ہی کمنٹس میں بتاسکتاہے، مگر میرے پیشِ نظرجومقاصدتھے،گزشتہ کئی مضامین میں بیان کرچکاہوں۔ اس مضمون میں آوازِاردوکے کچھ مجوزہ ذرائع آمدن کاذکر کرنامقصود تھا۔

جیساکہ شروع میں بتایا کہ آمدنی بہرحال مقصد تھا،گوکہ اصل مقصدنہیں تھا۔اسی لیے یوٹیوب،فیس بک،فیب سپاٹ،رمبل،ٹک ٹاک،انسٹاگرام وغیرہ کا آغاز کیا،مگر ان سب کا اصل مقصد آوازِاردو اورصوتی کتابوں کےبارے میں آگاہی پیدا کرنا تھا۔ پھر ویب سائٹ کا آغازکیا۔دراصل  میں ایک ایسابڑا فری لانس ویب پورٹل  بناناچاہتاتھا، جہاں اپ ورک اورفائیور کی طرز پر وائس اوور آرٹسٹ خواتین وحضرات اورآڈیوکتابیں سننےکےشوقین جمع ہوں اور اپنی پسندیدہ کتابیں ،اپنی پسندیدہ آواز میں سن سکیں۔ اس  مجوزہ پورٹل کی تفصیلات پہلےبھی ایک مضمون میں لکھ چکاہوں۔ یہ ماڈل گوگل ایڈسنس کےذریعے آمدنی حاصل کرنے کاہے۔ ہم(یعنی وائس اوور آرٹسٹ ٹیم) سائٹ پر صرف کتاب پڑھ کرسنائیں گے، نہ کہ فروخت کریں گے۔ اب جتنی دیرسامع سائٹ پر رہےگا، اسے اشتہار دکھاکر آمدنی کا ذریعہ پیداکیاجاسکتاہے۔ آوازِاردووائس اوور آرٹسٹ کی آمدنی میں سے اپناحصہ نہیں لےگا ،بلکہ اس طرح گوگل ایڈز کےذریعے آمدنی حاصل کرے گا۔

دوسراذریعہ یوٹیوب اوربقیہ سوشل میڈیاچینلز کےذریعے آمدنی حاصل کرنےکا ہے۔ یوٹیوب چینل کی مونیٹائزیشن  میں ابھی کچھ وقت لگے گا۔ فیس بک اگرچہ مجھے آمدنی حاصل کرنےکی اجازت دےرہاہے، مگر فی الحال پاکستان میں مونیٹائزیشن بند ہے، ہاں! اگر بیرونِ ملک خصوصاً مغربی ممالک کا کوئی اکاؤنٹ مل جاتاہے تو یہ کام ممکن ہے، اس کےلیے بھی کوششیں جاری ہیں۔

تیسرابڑا ذریعہ پبلشرز اور مصنفین کےلیے صوتی کتاب تیار کرکے دینےکی خدمات فراہم کرناہے۔ اس سلسلے کا آغاز ہوچکا ہے۔ جناب محمد حنیف بندھانی کی کتاب “مال گاڑی میں امانتیں” ان کے پبلشر “قلم فاؤنڈیشن” نے مجھ سے آڈیو میں منتقل کرائی ہے۔ میں نے اپنی جانب  سے انہیں اس صوتی کتاب سے فائدہ اٹھانےکےطریقے بھی بتائے جو اپنے گزشتہ مضمون میں ذکرکیے تھے۔ اسی طرح مصنفین بھی اپنی کتابیں اگرخود پڑھیں تو فبہا! اگرنہ آوازِاردو ان کی جانب سے یہ خدمت سرانجام دے سکتاہے اور وہ اپنی ویب سائٹ پر یہ کتابیں اپلوڈ کرکے سوشل میڈیا کےذریعے ساری دنیاسے ٹریفک لاسکتے ہیں اور اپنے لیے ذریعہءِآمدنی پیداکرسکتے ہیں۔

چوتھا اورسب سے اہم ذریعہ اے۔آئی وائس اوورٹول ہے، جس کےلیے کوششیں جاری ہیں۔ اس سے یہ چاہاجارہاہے کہ انٹرنیٹ پرموجود لاکھوں غیرمعیاری پی۔ڈی۔ایف کتابوں کو اس ٹول کے ذریعے قدرتی لب و لہجے میں ، جذبات وتاثرات سے بھرپور آواز میں سناجاسکے۔ یعنی آپ کوئی بھی اردوکتاب انٹرنیٹ پرتلاش کررہےہیں تو آپ کےسامنے تجویز آتی ہے کہ اگر آپ چاہیں تو اس کتاب کو “سُن” بھی سکتے ہیں۔ جواب مثبت ہونے کی صورت میں اس کتاب کے ابواب کی فہرست آپ کےسامنے آتی ہے، جس میں سے آپ اپنی مرضی کا باب چن سکتے ہیں۔ یہ ٹول آپ کو کتاب سناناشروع کردے گا۔ ایک حد تک سننےکےبعداگر آپ اس سلسلے کوجاری رکھناچاہیں گے تو سبسکرپشن فیس اداکرنی ہوگی، جیساکہ عموماً انٹرنیٹ پر اس قسم کے ٹولز کےاستعمال کی صورت ہوتی ہے۔

یہ ایک بڑا کام ہے اور باقاعدہ سرمایہ کاری کا پُرکشش  موقع بھی ہے۔ اب تک اگر اس شعبے میں سرمایہ کاری نہیں ہوسکی ہے تو اس کاسبب عوام کی عدم دلچسپی ہے، مگر جیسے جیسے دنیابھر میں برین ڈرین کی وجہ سے اردوبولنے والوں کی تعداد میں اضافہ ہورہاہے، علم کی اہمیت اورپیاس بڑھ رہی ہے، صوتی کتابوں کی اہمیت بھی بڑھتی چلی جارہی ہے۔ اس سرمایہ کاری کابڑاحصہ آگہی پروگرام پرخرچ ہوگا۔ عوام کوبتانا اور یاد دلانا ہوگا کہ کتابوں سے جُڑنا کتناضروری ہے اور اس کےلیے فی زمانہ بہترین ذریعہ صوتی کتابیں ہیں۔