Female Voice and Conversational Idioms: A Powerful Hidden Legacy

اردو زبان کی تاریخ میں خواتین کی بول چال، گھریلو محاورات اور نسوانی اسلوب ہمیشہ پس منظر میں رہے ہیں۔  یہ زبان کی اصل روح، سماجی ساخت اور تہذیبی تنوع کو سمجھنے کے لیے نہایت اہم حیثیت رکھتے ہیں۔ جن اہلِ قلم نے اس زبان کے ان گوشوں کو محفوظ کرنے کی طرف توجہ دی، اُن میں وزیر بیگم ضیاء کا نام نمایاں ہے۔ انہوں نے نہ صرف خواتین کی زبان کے لسانی حسن کو سمیٹا بلکہ اردو لغوی و ثقافتی ورثے کے ایک ایسے پہلو کو محفوظ کیا جسے عموماً نظر انداز کر دیا جاتا ہے۔ ذیل کا مضمون ان کی شخصیت اور ان کی گراں قدر کتاب محاوراتِ نسواں کے بارے میں ہے۔

وزیر بیگم ضیاء اردو کی ایک اہم مؤنث مصنفہ و محققّہ تھیں، جنہوں نے برصغیر کی خواتین کی روزمرہ بول چال، محاورات اور مخصوص لسانی انداز کو محفوظ کرنے کی کوشش کی۔ ان کی معروف ترین تصنیف محاوراتِ نسواں ہے، جو خواتین کے محاورات کا ایک جامع حوالہ ہے — اس میں قدیم و جدید ماخذوں سے محاورات جمع کیے گئے اور اُن کے معنی و محلِ استعمال واضح کیے گئے

محاوراتِ نسواں وزیر بیگم ضیاء کی وہ اہم اور منفرد تصنیف ہے جس میں انہوں نے برصغیر کی خواتین کی روزمرہ زبان، محاورات، تکیے کے کلام اور گھریلو طرزِ گفتگو کو پہلی بار باقاعدہ طور پر ایک مجموعے کی صورت میں محفوظ کیا۔ اس کتاب میں عورتوں کی مخصوص زبان—جس میں گھریلو ماحول، رشتوں، جذبات، مشاہدات اور نسوانی معاشرت کے رنگ نمایاں ہیں—نہایت سلیقے سے یکجا کی گئی ہے۔ محاوراتِ نسواں صرف لغوی ذخیرہ نہیں بلکہ اُس تہذیب و معاشرت کا آئینہ ہے جس میں یہ محاورے جنم لیتے ہیں۔ یہ کتاب اردو زبان کے لسانی و سماجی مطالعے کے لیے نہایت اہم ماخذ کی حیثیت رکھتی ہے۔

چوں کہ یہ کتاب بطورِ لغات مرتب کی گئی ہے،اس لیےاپنی ویڈیومیں  اس کا اقتباس پڑھ کرسنانےکےلیے آوازِاردو نے کتاب کے شروع میں دیےگئے پیش لفظ (عرضِ حال) کا انتخاب کیا۔ یہ اقتباس کلکتہ کی خواتین کانفرنس کے خطبہءصدارت میں بیگم مولانامحمدعلیؒ کےبیان سے شروع ہوتاہے۔ وہ فرماتی ہیں

“ہماری زبان اُردو جو ایک یتیم لڑکی کی طرح، جس کا کوئی پرسانِ حال نہ ہو، دلّی کے بازاروں میں آوارہ پھر رہی تھی۔ قلعۂ معلّیٰ کی بیگمات اور شہزادیوں نے اسے اپنی گود میں اُٹھا لیا اور اپنے آنچلوں کے سائے میں پرورش کر کے اُسے پروان چڑھایا کہ مردوں کی نظریں بھی اس پر پڑنے لگیں، اور انہوں نے رفتہ رفتہ فارسی کو ترک کر کے اس زبان کو منہ لگانا شروع کیا۔ چونکہ پرورش اس کی عورتوں ہی کی گود میں ہوئی تھی، اس لیے محاورات کے لحاظ سے ہمیشہ عورتوں ہی کی زبان شستہ سمجھی گئی۔ اُردو کا پہلا وطن دہلی تھا، لیکن جب قلعۂ معلّیٰ کی شہزادیاں شاہانِ اَوَڌ کے محل میں آئیں تو ان کے ساتھ اُردو بھی دہلی سے فیض آباد اور یہاں سے لکھنؤ پہنچی۔

عورتوں کی زبان کا مردوں کے لیے اختیار کرنا اس قدر مشکل تھا کہ بڑے بڑے شاعر بھی اسے نباہ نہ سکے۔ بلاشبہ سخت گوئیوں نے اپنی ریختی میں عورتوں کا منہ چڑانے کی زَر بَدر کوشش کی ہے، لیکن وہ محاورات اُن کی زبان پر چڑھے نہ تھے؛ وہ سراسر بازاری تھے۔ میں کافی اخلاقی جرأت سے کام لے کر یہ کہہ سکتی ہوں کہ مخدراتِ عصمت کی زبان کی پیروی ریختی گو شعرا سے بھی نہ ہوسکی”۔

مصنفہ لکھتی ہیں کہ بیگم صاحبہ مولانا محمد علی کا ارشاد بجا اور درست ہے، مگر اس میں بھی شک نہیں کہ بعض یخنی گویوں نے خوب چربہ اتارا ہے۔ پھر بھی اصل،  اصل ہے اور نقل، نقل۔

محترمہوزیربیگم کے دل میں عرصے سے یہ خیال جاگزیں تھا کہ مشاہیرِ اہلِ قلم کی تصانیف میں جس قدر زنانہ بولی کا ذخیرہ ہاتھ لگے، اُس کے موتی چن کر ایک لڑی میں پرودیں اور اپنی بساط کے موافق زبانِ اُردو کی خدمت بجا لائیں۔ یہ ولولہ اور شوق تھا جس نے انہیں اُبھارا، ورنہ اس کسمپرسی کے زمانے میں اتنی محنت کا مالی صلہ محکمۂ تعلیم سے کہاں مل سکتا تھا؟ اور سرکارِ عالیہ کے دربار میں پعدہ نشین خاتون کی رسائی امر محال تھا۔ مگرمصنفہ کو نہ تو  ستائش کی تمناتھی نہ صلے کی پروا۔۔

اسی ذوق میں برسوں بڑی بڑی لغاتِ اُردو کی خوشہ چینی میں سر مارا اور معتبر تصانیف کی ورق گردانی کی۔ کیونکہ یہ امر قدرتی ہے کہ قادرالکلام مصنفین نے جہاں عورت کا کردار پیش کیا ہے وہاں ان کے مقتضائے حال کے موافق وہی کلمات ان کے منہ سے ادا کیے ہیں جو انہوں نے اپنی ماؤں، بہنوں اور رشتے دار خواتین سے اپنے کانوں سے سنے ہوں گے۔ یہ ضرور ہے کہ ان کا دائرۂ معلومات محدود تھا کیونکہ پردے کی رسم کی وجہ سے دوسری شریف زادیوں کی گفتگو سننے کا انہیں موقع نہیں مل سکتا تھا۔

لیکن وہ بیگم مولانا محمد علی سےاختلاف کرتی ہیں کہ یہ محاورات اُن کی زبان پر چڑھے نہ تھے اور سراسر بازاری تھے۔
وہ لکھتی ہیں کہ ہمیں مشاہیر اہلِ قلم کا ممنونِ احسان ہونا چاہیے کہ انہوں نے اپنے زمانے کی عورتوں کی بول چال، روزمرہ اور محاورات کو ہمارے ہاتھوں تک پہنچا دیا، جبکہ عورتوں کو ملکی رسم ورواج کے مطابق اپنے جذبات و احساسات اور طبیعت کی قدرتی اُمنگوں کو بے روک ٹوک ظاہر کرنے کی جرأت نہ ہوتی۔ حالانکہ مذہب اور لٹریچر دونوں بالکل الگ چیزیں ہیں۔ اس میں کوئی شک نہیں کہ بزرگانِ دین کے طفیل یہ زبان ہندوستان میں رائج ہوئی۔

بہرحال اُردو زبان ترقی کرکے کوسوں دور نکل گئی ہے۔ تعلیمِ نسواں کی ترقی کے باوجود اس وقت ہندوستانی مسلمان خواتین عام طور پر نعتیہ کلام لکھنا ہی جائز سمجھتی تھیں اور لٹریچر کی دوسری اصناف—تغزل، مثنوی اور رومان—لکھنا گوارا نہیں کرتیں تھیں۔

ان حالات میں مصنفہ کےلیے محاوراتِ نسواں کی اسناد عورتوں کی اپنی انشا سےنکال لانا ممکن نہیں تھا۔ جب اصل چیز مقصود ہو تو اس کی نقل پر گزارا کرنا پڑتا ہے۔ان کےخیال میں عورتوں کو چاہیے کہ اپنی انشا سے اُردو لٹریچر کی ہر صنف کو مزین کریں، اپنے قدرتی جذبات کا اظہار کریں۔ جب شعر کہنا آتا ہو تو یہ ضروری نہیں کہ طبیعت پر زبردستی کر کے نعت ہی لکھی جائے۔ اپنے دل کا حال، اپنا مطلب اور اپنے محسوسات، خُطرت و عادت کے تقاضے کے مطابق ہی لکھنے چاہییں۔ مردوں کی نقل کرنے اور مولویانہ رنگ اختیار کرنے سے کیا فائدہ؟

اہلِ دہلی کہتے تھے کہ زبانِ اُردو ہماری گود میں پلی اور بڑھی، اہلِ لکھنؤ کا یہ دعویٰ تھا کہ ان کے زیرِ سایہ پروان چڑھی۔ لیکنمصنفہ کو اس چشمک اور رقیبانہ تکرار سے کچھ بحث نہیں۔ کسی خاص فرقے یا صوبے کے لوگوں کا اسے اپنی میراث سمجھ لینا اور دوسروں کو اسے دامن میں لیتے دیکھ کر اعتراض کرنا—
بالکل تنگ نظری اور تعصب پر مبنی تھا۔انہوں نے اپنی کتاب میں لکھنؤ اور دہلی کے محاورات یکجا رکھے۔

امصنفہ کےخیال میں اردو اور ہندی دونوں نے ہندوستان کی اصل ملکی زبان پر اپنی عمارت کھڑی کی۔ یہ دونوں ہندی کی گود میں پیدا ہوئیں اور گویا پراکرت بنیاد ہے اور غیرملکی زبانیں بیرونی عمارت۔ ان میں کوئی نمایاں فرق نہیں سوائے اس کے کہ بادشاہوں کے عہدِ حکومت میں اُردو نے فارسی رسم الخط کا لباسِ فاخرہ پہن لیا اور اس میں عربی فارسی الفاظ کی کثرت ہونے لگی، جیسے ہندی بہت سے ادق، مغلق اور کرخت سنسکرت کے الفاظ اپنے دامن میں لیے ہوئے ہے۔

دونوں بہنیں ایک دوسرے کو طعن و تشنیع دینے کے قابل نہیں۔ سنسکرت، عربی اور فارسی کے سیکڑوں ایسے الفاظ ہیں جن کے بغیر گزارہ ہوسکتا ہے لیکن دقت پسند اور مشکل نویس مصنفین اپنی علمیت و لیاقت جتانے کی غرض سے جا بجا استعمال کرتے رہتے ہیں۔ اگر ان کو نکال کر دیکھا جائے تو دونوں زبانوں کے خدوخال میں یک جہتی صاف نمایاں ہو جاتی ہے۔ لیکن یہ خرابیاں صرف تحریری زبان میں پیدا ہوئی ہیں۔ بول چال کی زبان کی فصاحت و سلامت ایسے تصنع، تکلف اور تقابل کو گوارا نہیں کر سکتی۔

چنانچہ “محاوراتِ نسواں” کو انہوں نے ان تکلفات سے مبرا رکھاہے اور خارجی اثرات سے الگ تھلگ۔ ان میں ہندی اُردو کا حسین ملاپ پایا جاتا ہے۔ شاید اس کی وجہ یہ ہو کہ اکثر مغل بادشاہوں کے حرم میں راجپوتانہ کی ہندو شہزادیاں داخل تھیں اور قدرتی امر ہے کہ ان کے ہمراہ کئی مائیں اور لونڈیاں بھی آ کر ٹھہرتی ہوں گی۔

شاہانِ دہلی کے دربار اور محل سراؤں میں ہر رنگ اور ہر مذہب کے لوگوں کا مجمع تھا، اس لیے جو بولی وقتی ضرورت کے لیے شہر میں پیدا ہوئی وہ قلعہ والوں کو راس آئی۔ آخر شاہجہان نے اسے اُردوئے معلّیٰ کا خطاب دیا۔ معلّیٰ کا لفظ ہی ظاہر کرتا ہے کہ اس کا تعلق قلعہ سے تھا۔

وزیر بیگم ضیاء کی کتاب “محاوراتِ نسواں” نہ صرف زبان کی ایک قیمتی دستاویز ہے بلکہ ایک پورے عہد کی سماجی، تہذیبی اور نسائی فضا کا نقشہ بھی پیش کرتی ہے۔ انہوں نے خواتین کی زبان کو محض الفاظ کے مجموعے کے طور پر نہیں دیکھا بلکہ اسے تہذیب، جذبات اور نسوانی تجربات کی ایک زندہ روایت سمجھا۔ یہی وجہ ہے کہ ان کی یہ کاوش آج بھی لسانیات، سماجیات اور اردو ادب کے محققین کے لیے ایک مستند و معتبر حوالہ بنی ہوئی ہے۔ یہ کتاب اس بات کی روشن مثال ہے کہ ایک محنتی، با ذوق اور صاحبِ نظر خاتون—سرپرستی یا مراعات کے بغیر—اردو زبان کی خدمت میں کس طرح ایک دیرپا کارنامہ انجام دے سکتی ہے